Isa 60 | ZomZIV | STEP | “Na khuavak hong tung zo-a, tho inla tang in; TOPA minthanna nang tungah hong suak ta hi.

Isaiah 60

Zion Minthanna

1 “Na khuavak hong tung zo-a, tho inla tang in; ^a
TOPA minthanna nang tungah hong suak ta hi. ^b
2 En in, khuamial in leitung tuama,
khuamial sahpi in mite a tuam hi; ^c
ahi hangin nang tungah TOPA hong suakin
ama minthanna nang tungah kilang hi.
3 Minamte in na khuavak hong zuan ding uh a, ^d
kumpite in na phalvak tangpha hong zuan ding uh hi. ^e
4 “Dakto inla en kawikawi in:
A vekpi-un kikaikhawmin nang hong zuan uh hi; ^f
gamlapi pan na tapate hong pai uh a,
na tanute ong khuttawi uh hi.
5 Tua ciangin enin na maitaang dinga ^g
na lungtang kisai-in lungnuamin a khang ding hi; ^h
tuipi tunga hauhnate na tungah hong kipuak dinga, ⁱ
minamte hauhna in nang hong zuan ding hi.
6 Midian-te le Ephah-te kala-oh note,
kala-oh honte in na gam a tuam ding hi. ^j
Kham le gim namtui pua-in
TOPA phatna tangko-in ^k
Sheba a om khempeuh hong pai ding uh hi.
7 Kedar tuuhonte khempeuh nang kiangah hong kipuak dinga, ^l
Nebaioth tuutalte in nang na semin,
ka biakna-tau ah biakna-in kisang dinga,
keimah in a minthangsa ka biakinnpi ka zem ding hi. ^m
8 “Meii lakah leng a,
a bu zuan kawlvakhu tawh a kibang kuate ahi hiam? ⁿ
9 Tuikulhte in kei lam hong en takpi uh a;
Tarshish ^{▼▼60.9 Ahikeh sumbuk tembaw} tembawpite in makaih hi; ^p
amah in thupina nang hong pia khin ahi manin,
Israel-te Siangtho Pa na Pasian le TOPA
a pahtawi dingin a ngun a kham uh tawh ^q
na tapate uh a gamlapi panin
hong puak ding hi. ^r
10 “Gamdang mite in na kulhte uh ciang kik ding uh a, ^s
a kumpite un na na uh sem ding uh hi. ^t
Hehna-in nang kong sat hangin,
kong angvanna-in ka khuatuahna kong lak hi. ^u
11 Mite in minamte hauhna hong puak theih nading -
a kumpite un makaihin a gualzawhna tawh a gualguala hong lut nadingun ^v
na kongpite uh honsa-in om den dinga, ^w
sun le zanin a kikhak ngei kei ding hi.
12 Ahang in, nang na a sem lo minam ahikeh kumpi-gam peuhmah mangthang dinga;
a kisiamang ding hi. ^x
13 “Lebanon minthanna - taksing, ^y
hiangpa sing le taksan singte khempeuh, ^z
ka mun siangtho a kilawmsak dingin na kiangah hong tung dinga;
ka khepek ngakna mun ka minthangsak ding hi. ^aa
14 Nang hong nengniamte’ tapate na mai-ah kunsa-in hong pai ding uh a; ^ab
nang hong simmawhte khempeuh
na khephungah bokin TOPA khuapi, ^ac
Israel-te’ Siangtho Pa’ Zion hong ci ding uh hi. ^ad
15 “Hong kimudahin hong kinusia a,
kuamah in khualzinna-in hong tot loh hangin ^ae
a kisathei den le ^af
khang tawntunga nuamsa-in kong bawl ding hi. ^ag
16 Minamte’ nawi na dawn ding uh a,
kumpi nawitui-in na kivak ding uh hi. ^ah
Tua ciangin TOPA keimah note Honpa note Tanpa,
Jacob Thahatpen Pa ka hilam nong thei ding uh hi. ^ai
17 Sumngo tangin kham,
sik munah ngun kong puak ding hi.
Sing tangin sumngo,
suang munah sik kong puak ding hi.
Na gam-ukpa uh lemna ka suaksak dinga, ^aj
na ukpa uh thumaanna ka suaksak ding hi.
18 Na gam sungah ngongtatna kiza nawn lo dinga,
na gamgite ah siatna le suksiatna om loin,
na kulhte Hotkhiatna ci-in, ^ak
na kongpite Phatna na ci ding hi. ^al
19 TOPA pen a tawntunga na khuavak hi-in, ^am
Na Pasian, na minthanna hi ding ahi manin, ^an
sunin na khuavak ni hi nawn lo dinga,
khapi tanna in nang hong tan nawn kei ding hi;
20 Na ni tum kik ngei nawn lo dinga,
na khapi a mang nawn kei ding hi;
TOPA na khuavak hi tawntung dinga,
na dahna nite a bei ding hi. ^ao
21 Tua ciangin na mite khempeuh thumaan ta ding uh a, ^ap
amaute in tua gam a nei den ding uh hi. ^aq
Ka thupina a kilat nadingin, ^ar
amaute ka khuta ka sep
ka suansa pana selte hi ding uh hi. ^as
22 Note a tawmpen tul khat na pha ding uh a,
a neu penpen minam thahat na suak ding uh hi.
Keimah TOPA ka hi hi;
a hun ciangin hih thu manlangtakin ka sem ding hi,” a ci hi. ^at